ភាពជាស្ត្រី ត្រូវបានគេចាត់ទុកថាជាភេទមួយ ដែលអាចងាយប្រឈមនឹងការបាក់ទឹកចិត្ត ឬការបាត់បង់នូវជំនឿជាក់លើខ្លួនឯងផងដែរ ជាពិសេសទៅលើស្ត្រីដែលមានរូបរាងខាងក្រៅមិនសូវមានភាពស្រស់ស្អាតដូចជាគេជាដើម។ ប៉ុន្តែតើជំនឿជាក់លើខ្លួនឯងវាពិតជាអាស្រ័យទៅលើរូបរាងខាងក្រៅទាំងស្រុងឬយ៉ាងណា?  

តាមពិតទៅជំនឿជាក់លើខ្លួនឯង ជាពិសេសសម្រាប់មនុស្សស្រី គឺវាមិនអាស្រ័យទៅលើរូបរាងខាងក្រៅទាំងស្រុងនោះទេ ប៉ុន្តែគឺវាអាស្រ័យទៅលើចំណេះវិជ្ជា បញ្ញា និងឥរិយាបថសមរម្យទៅវិញនោះទេ។ បើយោងតាមអ្វីដែលលោកជំទាវ ជា សិរី មានតួនាទីជាអគ្គនាយិកាបច្ចេកទេសធនាគារជាតិនៃកម្ពុជា ធ្លាប់បង្ហាញថា "ជំនឿទុកចិត្តលើខ្លួនឯងកើតឡើងពីការមានចំណេះវិជ្ជា និងឥរិយាបថសមរម្យ។ ជាទូទៅស្ត្រីភាគច្រើនតែងតែគិតថា រូបសម្បត្តិជាកត្តាសំខាន់ដើម្បីចូលចំណោមគេចុះ។ វាមិនត្រឹមត្រូវទាំងស្រុងឡើយ។ នេះមិនមែនមានន័យថា រូបសម្បត្តិមិនសំខាន់ទេ។ វាក៏សំខាន់ដែរ ដើម្បីទាក់ទាញអារម្មណ៍អ្នកដទៃពេលជួបគ្នាដំបូង។ ប៉ុន្តែចំណេះវិជ្ជា បញ្ញា និងឥរិយាបថសមរម្យឯណោះទេ ដែលធ្វើឱ្យគេដក់អារម្មណ៍ ចងចាំយើងបានយូរអង្វែង"។

ជារួមមកវិញ សូមកុំយករូបសម្រស់ខាងក្រៅមកវាយតម្លៃខ្លួនឯងថា ជាមនុស្សបែបណាមួយសោះ ព្រោះរូបរាងខាងក្រៅវាគ្រាន់តែជាផ្នែកតូចមួយតែប៉ុណ្ណោះ ហើយប្រសិនបើអ្នកមានរូបរាងខាងក្រៅមិនសូវស្អាតដូចគេ អ្នកក៏អាចខំប្រឹងក្រេបជញ្ជក់ចំណេះវិជ្ជាឲ្យបានជ្រៅជ្រះ ដើម្បីធ្វើឲ្យខ្លួនជាមនុស្សមានបញ្ញាឈ្លាសវៃ នៅរៀបចំឥរិយាបថរបស់ខ្លួនឯងឱ្យបានសមរម្យ នោះវានឹងនាំអ្នកឱ្យក្លាយទៅជាមនុស្សដែលស្រស់ស្អាតលើសរូបរាងខាងក្រៅ និងមានជំនឿទុកចិត្តលើខ្លួនឯងរហូតអាចសម្រេចចិត្តការងារផ្សេងៗទាំងតូចទាំងធំអាចទទួលបានជោគជ័យដូចអ្វីអ្នកប៉ងប្រាថ្នាផងដែរ៕